PRENTSA OHARRA

__________________________


Beste bainu-denboraldi baten atarian, LEA/AVCk jarduera ekonomikoak garatzeko beharrezkoak diren hondartzak okupatzeko gaitzen duten tituluen kudeaketa lehiakorragoa sustatzeko azterlana egin du, arreta surfari lotutako jardueran jarrita.

EAEko Administrazio Orokorra, hondartza duten kostaldeko udalerrietako toki-administrazioak eta irabazi-asmoko jarduerak egiten dituzten pertsonak –fisikoak edo juridikoak– dira dokumentuaren hartzaileak.

__________________________

  

BILBOn, 2025eko maiatzaren 8an / Lehiaren Euskal Agintaritzak (LEA/AVC), lehia sustatzeko bere jardueraren esparruan, espazio publikoaren kudeaketa lehiakorragoa errazteko, EAEko hondartzetan jarduera ekonomikoak garatzeko azterlana egin du. Guztira 48 hareatza dira –246 kilometroko kostaldean–, ingurumen- eta gizarte-balio bereziko espazio publikoak, oso preziatuak aisiarekin eta herritarren atsedenarekin duten loturarengatik. Horietan, gainera, jarduera ekonomiko garrantzitsua gauzatzen da.

 

Ildo horretan, LEA/AVCk lan egiten du administrazio publiko eskudunek, jarduera ekonomikoak egiten dituztenek eta herritarrek, oro har, kontzientzia har dezaten hondartzak eta zerbitzu-ustiapenak okupatzeko baimenak eskuratzeko ekitatezko baldintzak sortzeak lehiaren onurak aprobetxatzea ahalbidetuko duela, hala nola prezio baxuagoak, zerbitzuen kalitate hobea, hautatzeko aukera handiagoak eta abar.

“Hondartzen okupaziorako baimenetan lehia sustatzeko kudeaketa” azterlanak eragina du euskal itsasertzean, indarrean dagoen arau-esparruaren, lehia askearen printzipioaren eta erregulazio ekonomiko eraginkorraren printzipioen eta erabilerak emateko deialdien alderdi garrantzitsuenen azterketatik abiatuta, eta batez ere EAEko Administrazio Orokorrari eta hondartza duten kostaldeko udalerrietako tokiko administrazioei zuzendutako gomendioak ematen ditu.

Egiteko orduan Euskal Herriko Itsasertz Mugarteari emandako baimenei buruz eskatu zaion informazioa aztertu da bai eta hondartzak erabiltzeko baldintzei eta okupaziorako eta jardueretarako baimenen esleipenei buruz kostaldeko 24 udalerriei eskatutakoa ere. Halaber, kontuan hartu da 2025eko otsailaren 14tik martxoaren 14ra bitartean “EAEko hondartzetako zerbitzuei” buruz egin den kontsulta publikoaren emaitza. Ikerketak surfari lotutako jarduerari (surf eskolena) erreparatzen dio bereziki, eragin ekonomikoaren garrantzia dela eta. Kontuan izan behar da surfaren inguruko turismoak 45,5 milioi euroko eragin ekonomikoa duela, pertsona eta eguneko 152,9 euroko gastuarekin (iturria: BasqueTour).

LEA/AVCk egindako azterketari esker, eremu horretan kudeaketa lehiakorra egiteko oztopo nagusiak identifikatu ahal izan dira. Hauek nabarmentzen dira: lurraldeari lotutako lehia-abantailak, bereziki, operadoreei –udalerrian edo ingurunean– beharrezko justifikaziorik gabe eskatutako lokalei dagokienez; operadore berari esleitu dakizkiokeen baimenen kopuruan dauden mugak; araudira egokitzen ez diren surf-eskoletako monitoreen titulazio-eskakizunak; legezko betebeharrak gainditzen dituen baimena lortzeko aseguru gehigarrien eskakizuna; prestaketa- edo baimentze-aurreko fase baten garapena udalen eta operadore ekonomikoen artean, eskatu behar diren baimen zehatzak zehaztasunez ezagutzeko, kalitate-ziurtagiri jakin batzuen balorazioa, etab.

LEA/AVCk hareatzetako espazio publikoaren kudeaketa lehiakorragoa errazteko eta prozedura guztietan norgehiagoka bermatzeko hainbat gomendio ematen ditu, eta horiek eragina izango dute herritarrentzako zerbitzu hobeak lortzeko orduan.

• Hondartzen erabileren plangintza egokia egiteko beharra, udalek, foru-aldundiek eta Eusko Jaurlaritzak parte hartuko duten Hondartzak Erabiltzeko Plana, baimendutako erabilerak, sasoiko zerbitzuak eta jarduerak zehaztuko dituena, okupazio-eremuak mugatuko dituena eta baimenen iraupen egokia ahalbidetuko duena.

• Baimen-prozeduretan konkurrentzia lehiakorra bermatzea.

• Lokalak eskatzean formula berritzaileak aplikatzea gauzatzeko baldintza gisa. Adibidez, administrazio publikoek operadore ekonomikoen esku jarriko lituzkete instalazioak, desmuntagarriak edo bestelakoak, eta finantzaketa-formulak ezarri.

• Baimenen kudeaketa eraginkorra: denbora eta espazio eremua. Hondartzen erabilerarako plangintza egitea gomendatzen da, urte osoan zehar okupatzeko baimena horietako bakoitzean aurrez definitutako karga-atalaseekin eta okupazio-mugekin bateratzeko. Era berean, emandako baimenak parametro espazialetik malgutzeko mekanismoak ezartzea gomendatzen da, hau da, baimenak zabal daitezkeen hondartzei arreta emateko, adibidez, hondartza bat baino gehiago (edo lurraldearen arabera, etab.) okupatzeko baimenak sustatuz.

• Emandako baimenen zaintza eta kontrola indartzea, eta, hala badagokio, zehapen-mekanismoak ezartzea ez-betetzeetarako edo baimenik gabeko jardueretarako, baimenak emateko zenbait prozedura sustatzera behartuz.

 

 

LEA/AVCri buruz

LEA/AVC, Eusko Jaurlaritzako Ogasun eta Finantza Sailari atxikita dagoen administrazio izaerako erakunde autonomoa da, eta erakunde- eta funtzio-autonomia du bere eginkizunak betetzeko Euskal Autonomia Erkidegoan. Bere helburu orokorra Euskal Autonomia Erkidegoan egiten diren jarduketa ekonomikoei dagokienez merkatuko lehia askearen eta gardentasunaren baldintzak sustatzea, bermatzea eta hobetzea da.

 

 

“Hondartzen okupaziorako baimenetan lehia sustatzeko kudeaketa” azterlana LEA/AVCren webgunean dago eskuragarri.